BelMetal.org: Solarward - How To Survive A Rainout (2012)

Зусім нядаўна выйшаў новы альбом менскага гурта Solarward. І гэты альбом з'яўляецца, гледзячы па назве, сапраўдным падручнікам па выжываньні. Але, памятаючы вокладку папярэдняга альбома, гэта будзе зусім не падручнік па змаганьню з марозам і цемрай. На гэты раз на нас чырвоным грыбам глядзіць выбух і надпіс тонкімі літарамі: «How to survive a rainout».

Фалаўт, пасаны!

Першая кампазіцыя сустракае нас ні адавым пафасам, ні зубакрышывам у духу старой школы, ні атмасферным сумным ды эпічным інтра з дафігіцельнымі клявішамі ды харальнымі сьпевамі сісястых пышных баб. Не. Гучыць рок-н-ролл. Атмасфера задана, паехалі! Перад вачыма адразу ўсплываюць постапакліптычныя краявіды ў духу ўсім вядомай кампутэрнай гульні. Пясок, смага, іржавае гнілое жалеза і амерыканскія рэднэкі ў багі…

…Якія хутка зьмяняюцца ўжо «фірмовымі» гучаньнем і рыфамі Solarward, якія крыху радняць іх, напрыклад, з Immortal. Дарэчы, гучаньне амаль не зьмянілася, гурт можна пазнаць па індустрыяльнаму, крыху сухому, халоднаму гуку, які, дарэчы, разбаўлены шматлікімі нойзавамі ўстаўкамі (кшталту радыё, сонара і г.д.).

Вайна ды Сьвітаньне

На альбоме прэзентаваныя 12 трэкаў. Усе трэкі зусім не даўгія — у сярэднем па 3 хвіліны. Гурт можа і пазіцыяніруе сябе ўгарным «цяжкім рокам», але гэтыя 12 трэкаў не абяцаюць вам жыцьцярадасьці. Наадварот, амаль усе песьні толькі што не дэпрэсіўныя. Радыяцыйныя дажджы — гэта ня сьвята, згодны. Музычна гурт цягне сваю тэму, пачатую зь першых рэлізаў. Дарэчы, на гэтым дыску можна знайсьці ўжо вядомыя трэкі з альбома «As The Sky Stares Down». Як пішуць самі музыкі на сваім сайце, "… Дыск у лепшых традыцыях Solarward: песьні 2009-га года, запісаныя ў 2010-м ці, можа, у 2011-м і выдадзеныя ў 2012-м".

І гэты альбом, напэўна, можна падзяліць на дзьве паловы. Больш агрэсіўныя, трэшовыя трэкі ў першай палове, і больш атмасферныя ў другой. А падзяляе іх сумны эмбіентавы трэк «A Moment Of Emptiness». Што цікава, напрыканцы альбому можна пачуць беларускую мову, адзін з трэкаў як раз адрозьніваецца тым, што мае кірылічную назву. І я не магу не адзначыць трэк «They Travel There Alone», які моцна выбіваецца зь цемры астатніх песень сваёй мелядычнасьцю ды моцай, натхняя на тое, што ўсё будзе добра. Можа быць.

Смага

Лічу, што кожны знойдзе ў новай творчасьці гэтага гурта нешта сваё. Нават калі гэта будзе ўсяго пара трэкаў. Бо, зноў звярнуўшыся да афіцыйнай інфы пра альбом, "...ўсё, зразумела, на дыску ёсьць, акрамя гарэлкі, бо ўсю выпілі".

Усім Solarward і гарэлкі.

BelMetal.org